من عمل صالحا فلنفسه (باللغة الأردية)

پہلا خطبہ

ترجمه

سيف الرحمن التيمي

الحمد لله الغفورِ الشكورِ الجواد، أنزل الوحي هدى ورحمة للعباد، ومن يضلل الله فماله من هاد، وأشهد ألا إله إلا الله وحده لا شريك له، له الملك وله الحمد وهو على كل شيء قدير. وأشهد أن نبينا محمدا عبد الله ورسوله، خاتم أنبيائه، وسيد أصفيائه.

حمد وصلاة کے بعد:

میں آپ کو اور اپنی ذات کو تقوی الہی کی وصیت کرتا ہوں کیوں کہ نازل ہونے والی سب سے آخری آیت لوگوں کو اللہ سے ملاقات کی یاد دہانی کراتی ہے:

﴿ وَاتَّقُواْ يَوْماً تُرْجَعُونَ فِيهِ إِلَى اللهِ ثُمَّ تُوَفَّى كُلُّ نَفْسٍ مَّا كَسَبَتْ وَهُمْ لاَ يُظْلَمُونَ ﴾ [البقرة: 281]

ترجمہ: اور اس دن سے ڈرو جس میں تم سب اللہ تعالیٰ کی طرف لوٹائے جاؤگے اور ہر شخص کو اس کے اعمال کا پورا پورا بدلہ دیا جائے گا اور ان پر ظلم نہیں کیا جائے گا۔

اے رحمان کے بندو! امام ترمذی نے ام المومنین حضرت عائشہ رضی اللہ عنہا سے روایت کیا ہے کہ صحابہ نے ایک بکری ذبح کی، نبی اکرم صلی اللہ علیہ وسلم نے پوچھا: اس میں سے کچھ باقی ہے؟ میں نے کہا: دستی کے سوا اور کچھ نہیں باقی ہے، آپ نے فرمایا:  دستی کے سوا سب کچھ باقی ہے۔

علامہ البانی نے اس حدیث کو صحیح قرار دیا ہے۔

اللہ اکبر،گویا ہمارے نبی صلی اللہ علیہ وسلم صدقہ کی فضلیت کی طرف توجہ مبذول کرانا چاہتے ہیں،کیوں کہ صدقہ وخیرات ایسا عمل ہے جو آخرت تک جاری رہتا ہے،اور اس کا اجر وثواب آپ کے لیے باقی رہتا ہے۔

﴿ مَا عِنْدَكُمْ يَنْفَدُ وَمَا عِنْدَ اللَّهِ بَاقٍ ﴾ [النحل: 96]

ترجمہ:تمہارے پاس جو کچھ ہے سب فانی ہے اور اللہ تعالیٰ کے پاس جو کچھ ہے باقی ہے۔

آپ دنیا میں جسے کھاجاتے ہیں وہ خراب ہوکر فنا ہوجاتا ہے۔

اے رحمان کے بندے! پاک وبرحق ذات کے کلام میں غور وفکر کرنے والا بار باراس یاد دہانی کو محسوس کرتا ہے کہ آپ کی عبادت آپ کو ہی فائدہ پہنچاتی ہے،نیز آپ کی نافرمانی بھی آپ کے لئے ہی نقصادہ ثابت ہوتی ہے۔

اللہ کا ارشاد ہے:

﴿ لاَ يُكَلِّفُ اللّهُ نَفْساً إِلاَّ وُسْعَهَا لَهَا مَا كَسَبَتْ وَعَلَيْهَا مَا اكْتَسَبَتْ ﴾ [البقرة: 286]

ترجمہ:اللہ تعالیٰ کسی جان کو اس کی طاقت سے زیاده تکلیف نہیں دیتا، جو نیکی وه کرے وه اس کے لئے اور جو برائی وه کرے وه اس پر ہے۔

نیز اللہ پاک  فرماتا ہے:

﴿ قَدْ جَاءكُم بَصَائِرُ مِن رَّبِّكُمْ فَمَنْ أَبْصَرَ فَلِنَفْسِهِ وَمَنْ عَمِيَ فَعَلَيْهَا ﴾ [الأنعام: 104]

ترجمہ:اب بلاشبہ تمہارے پاس تمہارے رب کی جانب سے حق بینی کے ذرائع پہنچ چکے ہیں سو جو شخص دیکھ لے گا وه اپنا فائده کرے گا اور جو شخص اندھا رہے گا وه اپنا نقصان کرے گا۔

ایک اور جگہ اللہ ارشاد فرماتا ہے:

﴿ إِنَّا أَنزَلْنَا عَلَيْكَ الْكِتَابَ لِلنَّاسِ بِالْحَقِّ فَمَنِ اهْتَدَى فَلِنَفْسِهِ وَمَن ضَلَّ فَإِنَّمَا يَضِلُّ عَلَيْهَا ﴾ [الزمر: 41]

ترجمہ:آپ پر ہم نے حق کے ساتھ یہ کتاب لوگوں کے لیے نازل فرمائی ہے، پس جو شخص راه راست پر آجائے اس کے اپنے لیے نفع ہے اور جو گمراه ہوجائے اس کی گمراہی کا (وبال) اسی پر ہے۔

مزید اللہ فرماتا ہے:

﴿ مَنْ عَمِلَ صَالِحاً فَلِنَفْسِهِ وَمَنْ أَسَاء فَعَلَيْهَا وَمَا رَبُّكَ بِظَلَّامٍ لِّلْعَبِيدِ ﴾ [فصلت: 46]

ترجمہ:جو شخص نیک کام کرے گا وه اپنے نفع کے لیے اور جو برا کام کرے گا اس کا وبال اسی پر ہے۔ اور آپ کا رب بندوں پر ﻇلم کرنے واﻻ نہیں۔

اللہ بلند وبالا کا ارشادہے:

﴿ وَمَن تَزَكَّى فَإِنَّمَا يَتَزَكَّى لِنَفْسِهِ وَإِلَى اللَّهِ الْمَصِيرُ ﴾ [فاطر: 18]

ترجمہ:جو پاک ہوجائے وہ اپنے ہی نفع کے لئے پاک ہوگا،لوٹنا اللہ ہی کی طرف ہے۔

اللہ سبحانہ وتعالی کا فرمان ہے:

﴿ وَمَن شَكَرَ فَإِنَّمَا يَشْكُرُ لِنَفْسِهِ ﴾ [النمل: 40]

ترجمہ:شکر گزار اپنے ہی نفع کے لئے شکرگزاری کرتا ہے۔

اللہ بزگ وبالا فرماتا ہے:

﴿ وَمَن جَاهَدَ فَإِنَّمَا يُجَاهِدُ لِنَفْسِهِ إِنَّ اللَّهَ لَغَنِيٌّ عَنِ الْعَالَمِينَ ﴾ [العنكبوت: 6]

ترجمہ:اور ہر ایک کوشش کرنے والا اپنے ہی بھلے کی کوشش کرتا ہے ویسے تو اللہ تعالی تمام جہان والوں سے بے نیاز ہے۔

چنانچہ وہ ذات پاک ہے جو(سب کو کھلاتا ہے اسے کوئی نہیں کھلاتا)،اے میرے رب! تیری ذات پاک ہے،تو غنی وبے نیاز ہے اور ہم فقیرونادار ہیں،تو توانا ہے ہم کمزور وناتواں ہیں،تو معاف کرنے والا اور رحم کرنے والا ہے اور ہم گنہگار اور نادان ہیں۔

حدیث قدسی میں وارد ہوا ہے:"اگر تمہارے اگلے اور پچھلے، آدمی اور جنات سب ایسے ہو جائیں جیسے تمہارا بڑا پرہیزگار شخص تو میری سلطنت میں کچھ افزائش نہ ہو گی اور اگر تمہارے اگلے اور پچھلے، آدمی اور جنات سب ایسے ہو جائیں جیسے تمہارا بڑا بدکار شخص تو میری سلطنت میں سے کچھ کم نہ ہو گا۔ (اس حدیث کو امام مسلم نے روایت کیا ہے)

اے رحمان کے بندو! اس حقیقت کو محسوس کرنا  میرے اور آپ کے لئے بہت ضروری ہے جسے اللہ پاک نے بار بار دہرایا ہے کہ  نیک عمل سے بندہ ہی مستفید ہوتا ہے، حقیقی معنوں میں اس حقیقت کی معرفت وآشنائی‘ بندہ مومن کو اس بات پر آمادہ کرتا ہے کہ وہ ہدایت کے تئیں اپنی محتاجگی اور اس کے اسباب کی جستجو کے تئیں اپنی ضرورت کو محسوس کرے ، یہ احساس وشعور مومن کی ہمت کو نیک اعمال پر برانگیختہ کرتا ہے،

اور جب یہ ذہن نشیں رہے گا کہ آپ ہی مستفید ہونے والے ہیں تو یہ چیز آپ کے دل میں طاعت و بندگی کی چاشنی اور فرحت وسرور پیدا کرتی ہے، بلکہ بندہ مومن اپنے اوپر اللہ کے احسان و فضل کو یاد کرتا ہے جب اسے اللہ کی مدد ملتی اور اس کے لیے اجروثواب کے دروازے آسان ہوجاتے ہیں۔

حسن بصری سے کہا گیا کہ آپ نفس کو کس قدر تھکاتے ہیں،انہوں نے کہا: میں نفس کو راحت پہنچانا چاہتا ہوں۔

اللہ اکبر یہ کتنی عظیم نصیحتیں ہیں:

﴿ فَمَنْ أَبْصَرَ فَلِنَفْسِهِ ﴾ [الأنعام: 104]

ترجمہ: جو شخص دیکھ لے گا وه اپنا فائده کرے گا۔

﴿ فَمَنِ اهْتَدَى فَلِنَفْسِهِ ﴾ [الزمر: 41]

ترجمہ:جو شخص راه راست پر آجائے اس کے اپنے لیے نفع ہے۔

﴿ مَنْ عَمِلَ صَالِحاً فَلِنَفْسِهِ ﴾ [فصلت: 46]

ترجمہ:جو شخص نیک کام کرے گا وه اپنے نفع کے لیے۔

﴿ وَمَن تَزَكَّى فَإِنَّمَا يَتَزَكَّى لِنَفْسِهِ ﴾ [فاطر: 18]

ترجمہ: جو پاک ہوجائے وہ اپنے ہی نفع کے لئے پاک ہوگا۔

﴿ وَمَن تَزَكَّى فَإِنَّمَا يَتَزَكَّى لِنَفْسِهِ ﴾ [فاطر: 18]

ترجمہ:شکر گزار اپنے ہی نفع کے لئے شکرگزاری کرتا ہے۔

﴿ وَمَن جَاهَدَ فَإِنَّمَا يُجَاهِدُ لِنَفْسِهِ ﴾ [العنكبوت: 6]

ترجمہ:اور ہر ایک کوشش کرنے والا اپنے ہی بھلے کی کوشش کرتا ہے۔

اللہ مجھے اور آپ کو قرآن وحدیث اور ان میں موجود نشانی وحکمت سے فائدہ پہنچائے،اللہ سے توبہ واستغفار کیجیے یقینا وہ بہت زیادہ بخشنے والا ہے۔

دوسرا خطبہ:

الحمد لله القائل: ﴿ إِنْ أَحْسَنتُمْ أَحْسَنتُمْ لِأَنفُسِكُمْ ﴾، وصلى الله وسلم على نبيه المصطفى وعلى آله وصحبه ومن لدربهم اقتفى.

حمد وصلاة کے بعد!

اے رحمان کے بندو! خالص عبادات (جیسے نماز وروزہ) کی فضیلت ہم سے مخفی نہیں، لیکن شاید ان عبادات کی یاد دہانی کی ہمیں زیادہ ضرورت ہے،جن کا تعلق مخلوق سے ہے، اورجن عبادتوں کی ایسی فضیلتیں آئی ہیں جو ان کی رغبت دلاتی ہیں ساتھ ہی بندہ ان کے ذریعہ اجروثواب سے بھی بہرہ ور ہوتا ہے۔

اے اللہ کے بندو! اگر آپ کے رشتہ دار میں سے کوئی آپ سے قطع تعلق کرے تو آپ اس سے رشتہ جوڑیں، کیوں کہ صلہ رحمی آپ کے رزق میں کشادگی اور درازی عمر کا سبب ہے، اور صلہ رحمی کے تعلق سے رحمان کا یہ فرمان ہی آپ کے لئے کافی ہے کہ: "ہاں کیا تم اس پر راضی نہیں کہ میں اسے جوڑوں گا جو تم سے اپنے آپ کو جوڑے"۔ یقین مانیں آپ ہی پہلے استفادہ کرنے والے ہیں!

اگر آپ نے کسی نادار مسلمان کی پردہ پوشی کی تو سب سے پہلے آپ کو ہی فائدہ پہنچے گا: "جس نے کسی مسلمان کی پردہ پوشی کی اللہ اس کی دینا وآخرت میں پردہ پوشی کرےگا"۔

اگر آپ کسی فقیر کو صدقہ دیتے ہیں تو اس کا فائدہ اس سے زیادہ آپ کو پہنچتا ہے:

﴿ وَمَا تُنفِقُواْ مِنْ خَيْرٍ فَلأنفُسِكُمْ ﴾ [البقرة: 272]

ترجمہ: اور تم جو بھلی چیز اللہ کی راہ میں دو گے اس کا فائدہ خود پاؤ گے۔

کیوں کہ اگر اسے دنیوی منفعت حاصل ہوتی ہے تو آپ کو دنیوی اور اخروی دونوں  منفعت ملتی ہے!

اگر آپ راستے سے کوئی لوہا،یا شیشہ یا دوسری ایسی چیزیں ہٹادیتے ہیں جو لوگوں کو نقصان پہنچانے والی ہو‘ تو سب پہلے آپ اس سے مستفید ہونے والے ہوتے ہیں! کیا نبی کریم صلی اللہ علیہ نے ہمیں ایسے شخص کے بارے میں خبر نہیں دیا ہے جو راستے سے کانٹا ہٹانے کی وجہ سے جنت میں داخل ہوا؟

جب  آپ اپنے بھائی کے لیے غائبانے میں دعا کرتے ہیں تو پہلے آپ مستفید ہوتے ہیں! "کوئی مسلمان ایسا نہیں ہے جو اپنے بھائی کے لیے پیٹھ پیچھے اس کے لیے دعا کرے مگر فرشتہ کہتا ہے اور تجھ کو بھی یہی ملے گا"۔ (اس حدیث کو امام مسلم نے روایت کیا ہے)۔

جب آپ اپنے اوپر ظلم کرنے والے کو معاف کردیتے ہیں تو آپ کا اجروثواب اللہ کے ذمہ ہوتا ہے، اور کریم وفیاض کی نوازش کے بارے میں  آپ کا کیا خیال ہے!

چنانچہ دنیا میں آپ دلی راحت سے  فیض یاب ہوتے ہیں،اور آخرت میں آپ کے لیے اجرعظیم ہے،اگر آپ اپنے بھائی کی کسی ضرورت (کی تکمیل کے لیے) کوشش کرتے ہیں،تو آپ پہلے استفادہ کرنے والے ہوتے ہیں،"جو شخص اپنے بھائی کی ضرورت پوری کرے، اللہ تعالیٰ اس کی ضرورت پوری کرے گا"(اس حدیث کو امام بخاری نے روایت کیا ہے)۔

جو تنگ دست انسان کے ساتھ صبر وتحمل (مہلت اور درگزر) کا معاملہ کرتا ہے یا اس کا کچھ قرض معاف کردیتا ہے، تو سب سے پہلے اس کا فائدہ اٹھانے والا وہ خود ہوتا ہے: "جو شخص کسی تنگ دست (قرض دار) کو مہلت دے یا اس کا کچھ قرض معا کردے تو اللہ اسے قیامت کے دن اپنے عرش کے سایہ کے نیچے جگہ دے گا"۔(اس حدیث کو امام مسلم نے روایت کیا ہے )

اگر کوئی آپ کے ساتھ بد سلوکی کرتا ہے اور آپ اس کے ساتھ اچھا برتاؤ کرتے ہیں تو آپ بڑے خوش نصیب ہیں۔

اگر آپ کسی مسلمان کی سختی وپریشانی کو دور کردیتے ہیں تو آپ پہلے استفادہ کرنے والے ہوتے ہیں: "جس نے کسی مومن سے دنیا کی تکلیفوں میں سے کوئی تکلیف دور کی اللہ اس کی آخرت کی تکلیفوں میں سے کوئی تکلیف دور کرے گا"(اس حدیث کو امام مسلم نے روایت کیا ہے)۔

درود وسلام پڑھیں.....

صلی اللہ علیہ وسلم