من دروس رمضان (باللغة الأردية)

رمضان کے بعض دروس واسباق

ترجمه

سيف الرحمن التيمي

پہلا خطبہ

حمد وثنا کے بعد!

نمازیو! رمضان کے مدرسہ سے مسلمان مختلف اور متفاوت نتائج وثمرات کے ساتھ نکلتے ہیں، شب وروز کی گردش میں ہمارے لیے عبرت ہے، شام گزرتی اور صبح نو نمودار ہوتی ہے، سرعت کے ساتھ دن ورات کا گزرنا وقت کی تنگی اور کمی پر زور ڈالتا ہے جوکہ قیامت کے ان نشانیوں میں سے ہے جن کی ہمیں مصطفی صلى اللہ علیہ وسلم نے خبر دی، جیسا کہ صحیحین میں وارد ہوا ہے ، قرآن مجید کی آیت ہے: ﴿ وَهُوَ الَّذِي جَعَلَ اللَّيْلَ وَالنَّهَارَ خِلْفَةً لِمَنْ أَرَادَ أَنْ يَذَّكَّرَ أَوْ أَرَادَ شُكُورًا ﴾ [الفرقان: 62].

ترجمہ: اسی نے رات اور دن کو ایک دوسرے کے پیچھے آنے جانے واﻻ بنایا۔ اس شخص کی نصیحت کے لیے جو نصیحت حاصل کرنے یا شکر گزاری کرنے کا اراده رکھتا ہو۔

ایمانی بھائیو! مسلمان پورا مہینہ اپنے رب کی برکتوں سے فیض اٹھاتے رہے، دعاء واذکار ، نماز، صدقہ وخیرا ت اور تلاوت قرآن میں منہمک رہے۔

اللہ عزوجل نے سچ فرمایا: ﴿ أَيَّامًا مَعْدُودَاتٍ ﴾ [البقرة: 184]

ترجمہ: گنتی کے چند ہی دن ہیں۔

دیکھتے دیکھتے یہ وقت گزر جاتا ہے۔

حقیقی معنوں میں رمضان ایک ایسا مدرسہ ہے جس سے ہم بہت سے دروس سیکھتے ہیں، ان میں سے چند نمایاں دروس یہاں ذکر کیے جا رہے ہیں:

پہلا درس: اللہ کے احکام پر عمل پیرا ہوکر اللہ پاک کی عبودیت کو بروئے عمل لانا، چنانچہ مسلمان ایک متعینہ وقت تک روزہ رکھتا ہے اور وقت متعین کے درمیان کھاتا پیتا ہے، تاکہ اللہ کے حکم کی بجا آوری ہوسکے اور اپنے رب کی یاد او رخشیت اس کے دل میں ہمہ وقت زندہ رہے۔

دوسرا درس: قرآن سے وابستگی اور تعلق میں اضافہ، سماعت کے ذریعہ ہو یا تلاوت کے ذریعہ، تلاوت پر کتنا زیادہ اجر وثواب ملتا ہے! قرآن پر غور وفکر کرنے سے کتنے نتائج وثمرات سامنے آتے ہیں! لہذا مسلمان کو چاہئے کہ رمضان کے بعد بھی روزانہ قرآن کی چند آیتوں کی تلاوت کیا کرے، صحیح بخاری میں آیا ہے، آپ علیہ الصلاۃ والسلام نےعبد اللہ بن عمرو سے فرمایا: ”ہر مہینے میں ایک بار قرآن مجید ختم کیا کرو۔“ انہوں نے عرض کیا: مجھے تو اس سے زیادہ پڑھنے کی طاقت ہے۔ آپ نے فرمایا: ”اچھا تم سات راتوں میں قرآن مجید ختم کیا کرو، اس سے زیادہ نہ پڑھو۔“   آپ –اللہ آپ کی حفاظت فرمائے- اگر ہر فرض نماز میں صرف دو صفحہ قرآن پڑھیں گے تو بھی ہر مہینہ میں بہ آسانی قرآن ختم کرسکتے ہیں۔

رمضان سے حاصل ہونے والے تربیتی دروس میں سے یہ بھی ہے کہ نفس کو صبر کی تربیت ملتی ہے، رمضان میں صبر کی تینوں قسمیں یکجا ہوجاتی ہیں: طاعت کی بجاآوری پر صبر، معصیت سے اجتناب پر پر صبر، اور اللہ کی تقدیروں پر صبر۔

رمضان نے ہمارے اندر جو اچھے اثرات چھوڑے ہیں ، ان میں سے یہ بھی ہے کہ: ہم مسجد میں بیٹھنے اور وقت گزارنے کے عادی ہوگئے ، مسجدیں اللہ کے گھر ہیں، وہ شخص کتنے اجر وثواب سے اپنے دامن مراد کو بھرتا ہے جو دیر تک مسجد میں بیٹھا رہتا ہے۔

رمضان کے اہم دروس میں سے یہ بھی ہے کہ: مسلمان شب بیداری کا عادی ہوتا ہے، مسلمان کو چاہئے کہ اپنے نفس کو تدرج کے ساتھ (عبادت کا) خوگر بنائے، جو شخص وتر نہیں پڑھا کرتا تھا، اسے چاہئے کہ ایک رکعت وتر کی پابندی کرے، اور جو شخص رمضان سے قبل ایک رکعت وتر پڑھنے کا عادی تھا وہ تین رکعت پڑھنے کی عادت ڈالے، او رجو شخص تین رکعت پڑھا کرتا تھا وہ اب پانچ رکعت پڑھا کرے ، اسی طرح ہر انسان اپنے نفس کو مزید سے مزید عبادت کا عادی بنائے اور (یاد رکھے) کہ   ہمارے اسوہ ونمونہ محمد صلی اللہ علیہ وسلم گیارہ رکعات پڑھا کرتےتھے۔

صحیحین میں عبد اللہ بن عمر رضی اللہ عنہما سے مروی ہے، فرماتے ہیں: رسول اللہ ﷺ کی حیات مبارکہ میں جو شخص کو ئی خواب دیکھتا تو وہ اس کو رسول اللہ ﷺ کے سامنے بیان کرتا ،میری بھی آرزوتھی کہ میں بھی کو ئی خواب دیکھوں اور اس کو رسول اللہ ﷺ کے سامنے بیان کروں ۔میں ایک غیر شادی شدہ نو جوان تھا اور رسول اللہ ﷺ کے زمانےمیں مسجد میں سویا کرتا تھا ،میں نے خواب میں دیکھا کہ جیسے دوفرشتوں نے مجھے پکڑا اور جہنم کی طرف لے گئے۔میں نے دیکھا کہ دوزخ کے کنارے پر کنویں کی منڈیر کی طرح تہ در تہ منڈیر بنی ہو ئی ہے اور اس کے دو ستون ہیں جس طرح کنویں کے ستون ہو تے ہیں اور اس کے اندر لو گ ہیں جن کو میں پہچانتا ہوں تو میں نے کہنا شروع کر دیا ۔میں آگ سے اللہ کی پناہ میں آتا ہوں ،میں آگ سے اللہ کی پناہ میں آتا ہوں، میں آگ سے اللہ کی پناہ میں آتا ہوں۔کہا: تو ان دونوں فرشتوں سے ایک اور فرشتہ آکر ملا ،اس نے مجھ سے کہا: تم مت ڈرو۔میں نے یہ خواب حضرت حفصہ رضی اللہ تعالیٰ عنہا سے بیان کیا ،حضرت حفصہ رسول اللہ ﷺ سے بیان کیا تو نبی ﷺ نے فر یا :"عبد اللہ خوب آدمی ہے! اگر یہ رات کو اٹھ کر نماز پڑھا کرے۔"سالم نے کہا: اس کے بعد حضرت عبد اللہ بن عمر رضی اللہ تعالیٰ عنہ رات کو بہت کم سوتے تھے۔ (زیادہ وقت نماز پڑھتے تھے۔)

میرے اسلامی بھائیو! حقیقی معنوں میں رمضان ایک ایمانی اور تربیتی مدرسہ ہے،آپ غور کریں کہ اس ماہ میں مسلمان کس طرح اپنی بان کو فحش کلامی ، سب وشتم اور غیبت ودروغ گوئی جیسی محرمات سے محفوظ رکھتا ہے۔

بلکہ رمضان مسلمانوں کو کس قدر مضبوط کردیتا ہے، روئے زمین کے مختلف گوشوں میں مسلمانوں کی وحدت کا مظاہرہ ہوتا ہے! کیوں کہ سارے لوگ ایک ہی وقت میں روزہ رکھتے ہوئے اور ایک ہی وقت میں افطار کرتے ہوئے نظر آتے ہیں۔

اس ماہ میں مسلمان صدقہ وخیرات اور سخاوت وفیاضی کا کس قدر خوگر ہوجاتا ہے! کیا ہی خوب ہوگا کہ مسلمان ہر ماہ اپنے مال کا ایک خاص حصہ صدقہ کردیا کرے: ﴿ وَمَا أَنْفَقْتُمْ مِنْ شَيْءٍ فَهُوَ يُخْلِفُهُ وَهُوَ خَيْرُ الرَّازِقِينَ ﴾ [سبأ: 39].

ترجمہ: تم جو کچھ بھی اللہ کی راه میں خرچ کرو گے اللہ اس کا (پورا پورا) بدلہ دے گا اور وه سب سے بہتر روزی دینے واﻻ ہے۔

مسلمان کتنی دفعہ اپنے ہاتھ آسمان کی طرف اٹھاتا ہے، اپنے مولا کریم کے سامنے الحاح وزاری کرتا ہے، اس سے عفو ودرگزر کی دعا کرتا ہے، اور وآخرت کی بھلائی مانگتا ہے!

ہاں اے اصحاب فضیلت! اس ماہ مبارک کے بیش بہا اثرات وثمرات میں سے یہ صرف چند دروس واسباق ہیں،اللہ تعالی ہمیں اور آپ کو قرآن وسنت کی برکتوں سے بہرہ ور فرمائے اور ان میں جو آیت وحکمت ہے ، انہیں ہمارے لیے مفید بنائے ، آپ سب اللہ سے مغفرت طلب کریں ، یقیناً وہ خوب معاف کرنے والا بڑا مہربان ہے۔

دوسرا خطبہ

الحمد لله وحدَه، والصلاة والسلام على من لا نبي بعده، وأشهد أن لا إله إلا الله وحده لا شريك له، وأشهد أن محمدًا عبده ورسوله.

حمد وصلاۃ کے بعد:

اللہ کے بندو! یہ ایک واضح اور نمایاں چیز ہے کہ رمضان میں طاعت وعبادت اور خیرات وصدقات   بڑھ جاتی ہیں اور برائیاں کم ہوجاتی ہیں، ان سب کا مقصد یہ ہوتا ہے: ﴿ لَعَلَّكُمْ تَتَّقُونَ ﴾ [البقرة: 183].

ترجمہ: تاکہ تم تقوی ا ختیار کرو۔

اے فاضل لوگو! جب روزہ کے اس قدر بیش بہا اور مختلف النوع فوائد وثمرات ہیں، تو مسلمان کو چاہئے کہ ہر ماہ میں تین دن کے روزے رکھا کرے، جیسا کہ حبیب مصطفی صلی اللہ علیہ وسلم نے اپنے صحابہ کرام کو وصیت فرمائی، کیوں کہ روزہ ایمانی قوت اور جسمانی عافیت کا سبب ہے، آپ اللہ سے مدد طلب کریں اور عزم مصمم کرلیں۔

میرے اسلامی بھائیو! شارع حکیم نے شوال کے چھ روزے مشروع قرار دیے ہیں، ان روزوں کو نیکی کے بعد پے درپے نیکی میں شمار کیا ہے، چنانچہ نبی صلی اللہ علیہ وسلم کی حدیث ہے: (جس شخص نے رمضان کے روزے رکھے، پھر اس کے بعد شوال میں چھ روزے بھی رکھ لیے تو اس نے گویا زمانے بھر روزے رکھے)۔

بعض اہل علم فرماتے ہیں : رمضان کے بعد چھ روزے زمانے بھر کے روزے کی طرح اس لیے ہیں کہ اللہ تعالی ہر نیکی پر دس نیکی کا ثواب دیتا ہے، جیسا کہ اللہ کا فرمان ہے: ﴿ مَنْ جَاءَ بِالْحَسَنَةِ فَلَهُ عَشْرُ أَمْثَالِهَا ﴾ [الأنعام: 160]

ترجمہ: جو شخص نیک کام کرے گا اس کو اس کے دس گنا ملیں گے ۔

اس طرح رمضان کے روزے دس ماہ کے روزوں کی طرح ہیں، اور شوال کے چھ روزے دو ماہ کے روزے کی طرح ہیں، یوں پورے سال کے روزے کا اجر وثواب حاصل ہوجاتا ہے، واللہ اعلم.

صلى الله عليه وسلم.